തെക്കൻ കരിയാത്തൻ തെയ്യവും കൈക്കോലൻ തെയ്യവും.

തെക്കൻ കരിയാത്തനും കൈക്കോലൻ തെയ്യവും:

ഐതിഹ്യങ്ങളും വിശ്വാസങ്ങളും

വടക്കൻ കേരളത്തിൽ, പ്രത്യേകിച്ച് കണ്ണൂർ, കോഴിക്കോട് ജില്ലകളിലെ വിരലിലെണ്ണാവുന്ന കാവുകളിൽ മാത്രം കെട്ടിയാടിക്കുന്ന അപൂർവ്വവും അതിശക്തവുമായ തെയ്യങ്ങളാണ് തെക്കൻ കരിയാത്തനും കൈക്കോലനും. ശിവാംശജാതനായ കരിയാത്തൻ 'തെക്കൻ ചാത്തു' എന്നും അറിയപ്പെടുന്നുണ്ടെങ്കിലും 'തെക്കൻ കരിയാത്തൻ' എന്ന പേരിലാണ് കൂടുതൽ പ്രശസ്തൻ. കരിയാത്തനോടൊപ്പം തന്നെ കെട്ടിയാടിക്കുന്ന മറ്റൊരു തെയ്യമാണ് കൈക്കോലൻ.

ഉത്ഭവവും ഐതിഹ്യവും

തെക്കൻ കരിയാത്തന്റെ ഉത്ഭവവുമായി ബന്ധപ്പെട്ട് പ്രധാനമായും രണ്ട് ഐതിഹ്യങ്ങളാണ് നിലനിൽക്കുന്നത്.

കരിഞ്ചിലാടൻ ചിറയിലെ അത്ഭുത മത്സ്യങ്ങൾ പാലാർ വീട്ടിൽ പടനായരും പാലക്കുന്നത്ത് കേളേന്ദ്രനായരും മലപൊലിച്ച് നായാടാനും കറ്റൽ പൊലിച്ച് മീൻ പിടിക്കാനും പുറപ്പെട്ടതിലൂടെയാണ് ഈ ഐതിഹ്യം ആരംഭിക്കുന്നത്. നായാട്ടിൽ ഒന്നും ലഭിക്കാതെ ക്ഷീണിച്ചവശരായ ഇവർ വെള്ളം കുടിക്കാനായി കരിങ്കുലക്കണ്ടത്തക്കമ്മയുടെ വീട്ടിലെത്തി. അവരുടെ നിർബന്ധപ്രകാരം അവിടെനിന്നും ഭക്ഷണം കഴിച്ചതിന് ശേഷം, കുളിക്കാനായി കരിഞ്ചിലാടൻ ചിറയിലെത്തി. അവിടെവെച്ച് അത്ഭുതരൂപത്തിലുള്ള രണ്ട് മീനുകളെ കണ്ടെങ്കിലും അവരെ അവരെ കബളിപ്പിച്ച് തെന്നിമാറി.

തിരികെ വീട്ടിലെത്തിയപ്പോൾ സ്വന്തം കിണറ്റിലും ഇതേ മീനുകളെ കണ്ട അവർ, കദളിപ്പഴം വെള്ളിപ്പാളയിലിട്ട് കിണറ്റിലേക്ക് താഴ്ത്തി. അപ്പോൾ ആ മീനുകൾ രൂപം ചെറുതാക്കി പാളയിൽ കയറി. എന്നാൽ കറിവെക്കാനായി അവയെ മുറിക്കാൻ തുടങ്ങിയപ്പോഴാണ് അവ തങ്ങളുടെ യഥാർത്ഥ മായാരൂപം വെളിപ്പെടുത്തിയത്. ഒന്ന് ശിവചൈതന്യവും മറ്റൊന്ന് വിഷ്ണുചൈതന്യവും ആണെന്ന് തിരിച്ചറിഞ്ഞ അവർ, തങ്ങൾക്കറിയാതെ പറ്റിയ തെറ്റിന് മാപ്പിരക്കുകയും പ്രായശ്ചിത്തം ചെയ്യാൻ തീരുമാനിക്കുകയും ചെയ്തു.

അന്ന് തൊട്ട് ഏഴാം ദിവസം മതിലകത്തെ കരിങ്കൽ പടിയുടെ ഇരുവശത്തുനിന്നുമായി രണ്ട് പൊന്മക്കൾ ജനിക്കുമെന്നും, അവരെ വളർത്തി പയറ്റ് വിദ്യ പഠിപ്പിക്കുമെന്നും, അവരോളം വണ്ണത്തിൽ പൊൻരൂപമുണ്ടാക്കി കുഞ്ഞിമംഗലത്ത് കൊട്ടയിൽ സമർപ്പിക്കാമെന്നും അവർ ഉറപ്പുകൊടുത്തു. അങ്ങനെ ഏഴാം നാൾ കരിങ്കൽ പടിയുടെ ഇരുവശത്തും പൊടിച്ചുണ്ടായ പൊന്മക്കളാണ് തെക്കൻ കോമപ്പനും തെക്കൻ ചാത്തുവും.

ആയുധവിദ്യയും അത്ഭുത പ്രവർത്തികളും വിദ്യകളെല്ലാം അഭ്യസിച്ച് ചുരിക കെട്ടി ചേകോനാകേണ്ട പ്രായമായപ്പോൾ, ഇവർ പാണ്ടി പെരുമാളിൽ നിന്നും ചുരിക വാങ്ങി ആചാരപ്പെട്ടു. അതോടെ തെക്കൻ ചാത്തു 'തെക്കൻ കരിയാത്തൻ' എന്നും, തെക്കൻ കോമപ്പൻ 'തെക്കൻ മരുമകൻ' (കരുമകൻ) എന്നും അറിയപ്പെട്ടു. പിന്നീട് ഇവർ വലിയൊരു പനമുറിച്ച് വില്ലുകൾ ഉണ്ടാക്കുകയും ഇവരുടെ ജീവിതത്തിൽ പല അത്ഭുതങ്ങളും സംഭവിക്കുകയും ചെയ്തു. തങ്ങൾക്ക് മദ്യം നൽകാൻ വിസമ്മതിച്ച ചന്തൻ തണ്ടാനും തിരുനെല്ലൂർ തണ്ടാത്തിക്കും ഇവർ ഭ്രാന്ത് നൽകി. പിന്നീട് അവർ സൽക്കരിച്ചപ്പോൾ മാത്രമാണ് ആ ഭ്രാന്ത് മാറ്റിക്കൊടുത്തത്.

കൈക്കോലൻ തെയ്യം

തെക്കൻ കരിയാത്തനോടൊപ്പം തന്നെ കെട്ടിയാടിക്കുന്ന തെയ്യമാണ് കൈക്കോലൻ. ഇതിന് പിന്നിലുമുണ്ട് രസകരമായ ഒരു കഥ. കരിയാത്തന്റെയും മരുമകന്റെയും യാത്രക്കിടയിൽ, വഴിയിൽ വെച്ച് ഒരു കുട്ടി അവരെ പരിഹസിച്ചു. ഇതിൽ കോപിഷ്ഠനായ കരിയാത്തൻ ആ കുട്ടിയുടെ ഒരു കൈ മുറിച്ചുകളഞ്ഞു. തെറ്റ് മനസ്സിലാക്കിയ കുട്ടി കരഞ്ഞു മാപ്പപേക്ഷിച്ചതിനെ തുടർന്ന് അലിഞ്ഞ കരിയാത്തൻ കൈ തിരികെ നൽകി. പിന്നീട് ആ കുട്ടി അവരുടെ വിശ്വസ്തനായ സേവകനായി മാറി. ഈ കുട്ടിയുടെ സങ്കൽപ്പത്തിലാണ് കൈക്കോലൻ തെയ്യം കെട്ടിയാടിക്കുന്നത്.

വേഷവിധാനം: വളരെ ലളിതമായ വേഷമാണ് കൈക്കോലൻ തെയ്യത്തിന്റേത്. ശരീരത്തിൽ വെള്ള നിറവും മുഖത്ത് മഞ്ഞ നിറവുമാണ് പ്രധാന ചമയം. തലയിൽ 'കൊഴുപറ്റം' എന്നറിയപ്പെടുന്ന ചെറിയ ഒരു മുടിയും ഈ തെയ്യത്തിനുണ്ടാകും.

ചേണിച്ചേരി തറവാടും മറ്റൊരു ഐതിഹ്യവും

ചേണിച്ചേരി തറവാട്ടിലെ മുൻ കാരണവന്മാരിൽ ചിലർ വർഷങ്ങൾക്ക് മുൻപ് അമ്പലപ്പുഴയിൽ യുദ്ധത്തിന് പോയപ്പോൾ, അവിടെ വെച്ച് തെക്കൻ കരിയാത്തൻ അവരെ പലവിധത്തിലും സഹായിച്ചുവത്രേ. യുദ്ധം കഴിഞ്ഞ് തിരികെ വന്നപ്പോൾ അവർ കരിയാത്തന്റെ ചൈതന്യം കൂടെക്കൊണ്ടുവന്ന് പ്രതിഷ്ഠ നടത്തി എന്നാണ് മറ്റൊരു വിശ്വാസം. കണ്ണൂരിലെ അരോളി ശ്രീ മേൽച്ചിറ കോട്ടം ഈ ഐതിഹ്യവുമായി ബന്ധപ്പെട്ട് കരിയാത്തൻ തെയ്യം കെട്ടിയാടുന്ന പ്രധാന കാവുകളിൽ ഒന്നാണ്.

ആരാധനയും സമുദായങ്ങളും

നാവു തീയർ അഥവാ വളഞ്ചിയർ (ദേശഭേദമനുസരിച്ച് നാതിയൻ, നാദ്യൻ, വിളക്കിത്തല നായർ എന്നിങ്ങനെയും അറിയപ്പെടുന്നു) എന്ന സമുദായത്തിന്റെ പ്രധാന കുലദൈവങ്ങളിൽ ഒന്നാണ് തെക്കൻ കരിയാത്തൻ. സവർണ്ണർക്ക് ക്ഷൗരവൃത്തി ചെയ്യുന്നതാണ് ഇവരുടെ പരമ്പരാഗത കുലത്തൊഴിൽ. തെയ്യം ഇവരെ 'അറുവർ കാരണോന്മാരേ' എന്നാണ് സംബോധന ചെയ്യാറുള്ളത്. (അവർണ്ണരായ തീയർക്ക് പൗരോഹിത്യവും ക്ഷൗരവൃത്തിയും ചെയ്യുന്ന കാവുതീയരും നാവു തീയരും ഒരേ സമുദായമല്ല എന്നത് ശ്രദ്ധേയമാണ്). കൂടാതെ, ക്ടാരന്മാരുടെ കൂടി കുലദൈവമാണ് തെക്കൻ കരിയാത്തൻ.

തെക്കൻ കരിയാത്തൻ കെട്ടിയാടുന്ന പ്രധാന കാവുകൾ

• കണ്ണൂർ ജില്ല: ബ്ലാത്തൂർ താഴെപ്പള്ളിയത്ത് കോട്ടം, കണ്ണപുരം, കണ്ടക്കൈ, കുണ്ടയം കൊവ്വൽ, പരിയാരം, അരോളി ശ്രീ മേൽച്ചിറ കോട്ടം.

• കോഴിക്കോട് ജില്ല: തിക്കോടി പഞ്ചായത്തിലെ പുറക്കാട് ഗ്രാമത്തിലുള്ള അരിമ്പൂർ ശ്രീ കരിയാത്തൻ ക്ഷേത്രം.